Categoría: Novas

A Feira do Mel da Montaña celebrará en Baleira unha nova edición os días 24 e 25 de outubro, reunindo un ano máis produtores, artesáns e visitantes arredor do mel e doutros produtos ligados ao territorio. A programación combinará actividades para todos os públicos, degustacións, obradoiros e propostas para coñecer mellor o mundo da apicultura.
Durante a fin de semana, a feira contará coa presenza de diferentes expositores, que ofrecerán os seus produtos e permitirán ás persoas visitantes coñecer de primeira man a diversidade de producións da montaña lucense.

Programación

As actividades comezarán o sábado 24 pola tarde. A partir das 16:00 horas celebraranse diferentes obradoiros con cera e mel, unha oportunidade para descubrir as posibilidades destes dous produtos máis alá do seu uso habitual.
Ás 17:00 horas terán lugar xogos populares, pensados para compartir a xornada en familia e recuperar propostas tradicionais de ocio, entre os que podemos atopar o II Torneo de Billarda.
A programación continuará ás 18:00 horas cun taller sobre a calidade do mel, acompañado dunha cata do mel presentado ao concurso, que permitirá coñecer e comparar as diferentes características dos produtos participantes.
Como peche do sábado, ás 20:30 horas, celebrarase un magosto, cunha degustación gratuíta de empanada, viño e castañas.

O domingo 25 de outubro será a xornada central da feira, coa apertura dos postos ás 10:00 horas.
A partir das 11:00 horas retomaranse os obradoiros, mentres que ás 12:00 horas terá lugar a apertura do panel de cata, un dos momentos destacados da programación vinculada ao concurso do Mellor Mel da Montaña Lucense.
Ás 13:00 horas haberá unha degustación de cervexa de castaña e chulas de mel, combinando dous produtos estreitamente vinculados á gastronomía da montaña.
Xa ás 13:30 horas está prevista a visita de autoridades e, ás 14:30 horas, chegará un dos momentos máis agardados da xornada: a entrega de premios e diplomas do concurso Pintameles e do Mellor Mel da Montaña.

Un espazo para coñecer e poñer en valor os produtos da montaña

A Feira do Mel da Montaña volve así converterse nun punto de encontro para poñer en valor o traballo das persoas apicultoras, dar visibilidade aos produtos locais e achegar o mundo do mel aos veciños.

Ademais das actividades previstas no programa, as persoas visitantes poderán coñecer as propostas dos diferentes expositores e descubrir outros produtos elaborados no territorio.

No marco da feira celebrarase tamén a quinta edición do Concurso Comarcal de Meles da Montaña Lucense, no que se recoñecerán os mellores meles presentados polas persoas apicultoras do ámbito de actuación do GDR. As mostras poden entregarse ata o 15 de outubro, seguindo as condicións establecidas para o concurso. A programación inclúe tamén o concurso Pintameles, no que os máis pequenos achegan a súa particular visión do mundo do mel a través dos seus debuxos. As obras participantes poderán verse durante a feira.

Os días 24 e 25 de outubro, a Feira do Mel da Montaña agarda por vós para desfrutar dunha fin de semana de mel, produtos da terra, tradición e actividades para todos os públicos.

.

Casa Albaredo, en Brañas (Pedrafita do Cebreiro), acolleu os días 12 e 13 de setembro unha formación práctica centrada no valor dos bosques e nas posibilidades que ofrecen os espazos naturais para o benestar e o desenvolvemento de novas experiencias turísticas.

Unha formación con participantes de diferentes territorios

A actividade tivo unha excelente resposta e reuniu persoas vinculadas ao sector procedentes de diferentes concellos do territorio, así como participantes chegados de A Coruña, Oviedo e O Bierzo. A elevada participación puxo de manifesto o interese por propostas que conectan natureza, benestar e turismo.

Natureza, neurociencia e terapia forestal

A formación foi impartida por Alfonso Polvorinos, biólogo especialista en conexión coa natureza e autor de Neuronaturaleza, e Soraya Manzano, especialista en Terapia Forestal, que guiaron as persoas participantes ao longo de dúas xornadas nas que teoría e práctica estiveron estreitamente ligadas.

Os contidos abordaron a relación entre natureza e neurociencia, o valor dos bosques e os seus diferentes elementos terapéuticos, así como as posibilidades que ofrece o turismo de benestar na natureza. O obxectivo foi comprender como os espazos forestais poden converterse en escenarios para experiencias que favorezan a conexión coa contorna e o benestar das persoas.

Experimentar o bosque a través dos sentidos

A parte práctica permitiu trasladar estes coñecementos ao propio territorio. As persoas participantes realizaron actividades de interpretación da paisaxe, aprendendo a identificar e comprender aqueles elementos naturais que poden formar parte dunha experiencia de benestar; un paseo sensorial forestal, no que se traballou a conexión coa contorna a través dos sentidos; e, finalmente, un baño de bosque guiado, unha experiencia inmersiva que permitiu experimentar directamente esta práctica de Terapia Forestal.

As diferentes actividades serviron así para coñecer e experimentar os bosques desde unha perspectiva diferente, identificando os seus recursos e elementos terapéuticos e as posibilidades que poden ofrecer para a creación de novas experiencias vinculadas ao turismo de benestar.

Ao remate da formación, as persoas participantes recibiron diplomas acreditativos da súa participación, como peche de dúas xornadas de aprendizaxe e experimentación no medio natural.

Unha oportunidade para o turismo de benestar no territorio

O encontro serviu tamén para poñer sobre a mesa o potencial dos recursos naturais do Xeodestino Ancares-Terras de Burón para desenvolver novas propostas turísticas vinculadas ao benestar. Os seus bosques, paisaxes e espazos naturais ofrecen posibilidades que van máis alá da súa función como recurso turístico e que poden converterse en escenarios para experiencias relacionadas co descanso, a conexión coa natureza e o coidado persoal.

A presenza de participantes procedentes de diferentes puntos de Galicia, Asturias e O Bierzo contribuíu, ademais, a crear un espazo de intercambio de coñecementos e experiencias arredor deste ámbito.

Desde o GDR Montes e Vales Orientais, como entidade xestora do Xeodestino Ancares-Terras de Burón, valoramos moi positivamente o desenvolvemento desta formación e a resposta recibida. A participación acadada e o interese mostrado durante as xornadas reforzan a importancia de seguir explorando novas formas de poñer en valor os recursos naturais do territorio e xerar oportunidades arredor dun turismo ligado á natureza e ao benestar.

As xornadas deixan novas aprendizaxes e posibilidades para continuar traballando na creación de experiencias que permitan descubrir o territorio desde outras perspectivas.

A Casa do Cazador de Negueira de Muñiz acolleu este luns, 13 de xullo, a quinta e última xornada de presentación das Rutas Enoturísticas das IXP de Viño de Galicia, un proxecto de cooperación que durante os meses de xuño e xullo percorreu os cinco territorios vitivinícolas amparados polas Indicacións Xeográficas Protexidas galegas.

Nesta ocasión foi a quenda da IXP Terras do Navia, coa presentación da Ruta dos Viños entre Montañas, un itinerario que convida a descubrir un territorio no que a viticultura de montaña, a paisaxe, o patrimonio e a gastronomía conforman unha experiencia enoturística singular.

A xornada contou coa asistencia do alcalde de Navia de Suarna, José Fernández; do concelleiro de Obras de Navia de Suarna, Jorge Eugenio Rodríguez; do alcalde de Cervantes, Benigno Gómez; da concelleira de Negueira de Muñiz, Raquel Díaz Barcia; do alcalde da Fonsagrada e presidente do GDR Montes e Vales Orientais, Carlos López, ademais do equipo técnico do GDR e representantes do sector vitivinícola, turístico e doutras entidades participantes no proxecto.

Como non podía ser doutra maneira, na xornada tamén participaron as adegas Bodega da Señora, Adega Sidrón, Adega Panchín, Adega Cancelada e Adega Vizcaín, que presentaron os seus proxectos e os viños que elaboran nas Terras do Navia. O seu traballo exemplifica unha viticultura de montaña fortemente ligada ao territorio, ás variedades tradicionais e á conservación da paisaxe, converténdose nunha peza fundamental desta proposta enoturística. Durante a sesión destacouse o potencial da viticultura de montaña como elemento diferenciador das Terras do Navia e o papel que o enoturismo pode desempeñar na dinamización económica do rural e na promoción dos produtos locais.

O antropólogo Rafael Quintía foi o encargado de presentar a Ruta dos Viños entre Montañas, mentres que o sumiller Luis Paadín dirixiu unha cata comentada na que as persoas asistentes puideron coñecer as características dos viños elaborados polas adegas da IXP Terras do Navia.

A programación completouse cunha visita guiada por parte do itinerario enoturístico e unha nova cata comentada, permitindo descubrir sobre o terreo os recursos naturais, patrimoniais e vitivinícolas que forman parte desta proposta.

O GDR Montes e Vales Orientais participa neste proxecto de cooperación xunto aos GDR Pontevedra-Morrazo (coordinador), Deloa, Mariñas-Betanzos, Adercou e Salnés-Ulla-Umia, en colaboración coa Asociación das IXP de Viños de Galicia. A iniciativa desenvólvese ao abeiro da intervención LEADER do PEPAC 2023-2027 e conta co financiamento do FEADER, do Ministerio de Agricultura, Pesca e Alimentación e da Axencia Galega de Desenvolvemento Rural (AGADER).

O Xeodestino Ancares Terras de Burón continúa avanzando no seu compromiso cun modelo turístico sostible, responsable e ligado á conservación da natureza. Actualmente, o territorio conta con 12 empresas certificadas coa marca Soy Ecoturista un recoñecemento que avala o seu compromiso co patrimonio natural e cultural, así como coa mellora continua da súa actividade.

Esta certificación forma parte do Club de Producto Soy Ecoturista da Asociación de Ecoturismo de España, unha iniciativa que reúne espazos naturais protexidos e empresas turísticas que traballan baixo criterios de sustentabilidade, conservación e desenvolvemento local.

Un destino de referencia en Galicia

Ancares Terras de Burón foi o primeiro destino certificado de ecoturismo da provincia de Lugo e un dos primeiros de Galicia en incorporarse á rede Soy Ecoturista. Este recoñecemento supuxo un importante paso adiante para o territorio, ao situar a conservación da natureza e a implicación da comunidade local no centro da súa proposta turística.

A certificación abrangue empresas de distintos ámbitos: aloxamentos rurais, actividades na natureza, turismo activo, axencias de viaxes e experiencias vinculadas ao patrimonio cultural e ambiental e á gastronomía local.

As empresas certificadas entre 2025 e o que vai de 2026

Na actualidade forman parte da rede de empresas certificadas do destino Ancares Terras de Burón.

Na Reserva da Biosfera Os Ancares Lucenses, reserva xestionada pola Deputación de Lugo, certificáronse 9 empresas:

• Naviaventours, viaxes con esencia: axencia de viaxes – Navia de Suarna
• Casa do Bico: aloxamento – Becerreá
• Equusfera – A Fonsagrada
• Hotel Piornedo: aloxamento – Cervantes
• Casa O Crego: aloxamento – Cervantes
• Cabanas de Ancares: aloxamento – Cervantes
• Volta Montana: axencia de viaxes e actividades de ecoturismo – Pontevedra
• Coureleando: actividades- O Courel
• Pía Paxaro, sendeiros da natureza- O Courel

Na Reserva da Biosfera Río Eo, Oscos e Terras do Burón, reserva xestionada pola Xunta de Galicia, certificáronse 3 empresas ata o momento:

• Sons do Eo: apartamentos turísticos – Baleira.
• Tirolina das Minas: actividades – A Pontenova.
• Casona de Labrada: restaurante, aloxamento e actividades – A Pontenova.

Cada unha delas achega unha visión propia do territorio e contribúe a ofrecer experiencias auténticas, vinculadas á natureza, á cultura local e á identidade da montaña.

Que significa ser unha empresa ecoturista?

Obter a certificación Soy Ecoturista vai moito máis alá de cumprir unha serie de requisitos administrativos.

As empresas participantes deben desenvolver un plan de mellora ou unha actuación concreta de contribución ao territorio, vinculada á conservación da natureza, á sensibilización ambiental, á recuperación do patrimonio ou á promoción dos valores do espazo natural protexido no que operan.

Isto tradúcese en accións reais e medibles que permiten que a actividade turística teña un impacto positivo sobre o territorio. Desde a recuperación de hábitats e a plantación de especies autóctonas ata actividades de educación ambiental, interpretación da natureza ou posta en valor da cultura local, cada empresa achega a súa propia contribución.

O resultado é unha rede de negocios que non só reciben visitantes, senón que tamén participan activamente na conservación e valorización do territorio.

Turismo que contribúe a conservar

O ecoturismo baséase nunha idea sinxela: viaxar pode ser tamén unha forma de conservar.

Ao escoller empresas comprometidas co territorio, os visitantes contribúen á economía local, apoian proxectos sostibles e participan nun modelo turístico que respecta os recursos naturais e culturais.

No caso de Ancares Terras de Burón, este enfoque cobra especial relevancia. O territorio abrangue tres Reservas da Biosfera –Os Ancares Lucenses, Río Eo, Oscos e Terras de Burón e Terras do Miño– e conta cun patrimonio natural e cultural excepcional que require dunha xestión responsable e dun turismo compatible coa súa conservación.

A certificación destas empresas é tamén o resultado dun proceso de acompañamento impulsado polo GDR Montes e Vales Orientais, entidade xestora do Xeodestino, en colaboración coas empresas participantes e cos espazos naturais protexidos do territorio.

O obxectivo é seguir fortalecendo unha rede de iniciativas que demostran que é posible crear oportunidades económicas no rural ao tempo que se protexe o patrimonio natural e cultural.

Para o que vai de 2026, 12 empresas máis das tres reservas están adiantando o proceso de adhesión ao Club e estas empresas están a piques de certificarse. Tamén se van incorporar empresas da Reserva da Biosfera Terras do Miño. Así, empresas das tres reservas do xeodestino certifícanse e ofrecen auténticas experiencias de ecoturismo no territorio.

Porque o ecoturismo non consiste só en visitar un lugar. Consiste en coñecelo, valoralo e contribuír a que siga sendo un territorio vivo para as xeracións futuras.

Descubre as empresas ecoturistas de Ancares Terras de Burón e as experiencias que ofrecen en: Soy Ecoturista.

A convocatoria LEADER continúa demostrando o dinamismo e a capacidade de iniciativa existente no territorio do GDR Montes e Vales Orientais. Nesta anualidade presentáronse un total de 35 proxectos entre iniciativas produtivas e non produtivas promovidas tanto por entidades privadas como por administracións locais.

As axudas LEADER, enmarcadas no Plan Estratéxico da PAC 2023-2027, teñen como obxectivo apoiar proxectos que contribúan ao desenvolvemento económico, social e territorial do rural, favorecendo a creación de emprego, a mellora da calidade de vida e a posta en valor dos recursos locais.

Proxectos produtivos

Nesta convocatoria rexistráronse 19 solicitudes de proxectos produtivos privados, vinculados a sectores moi diversos do territorio.

O turismo continúa sendo un dos ámbitos con maior presenza, con 8 proxectos relacionados con aloxamentos, experiencias e servizos turísticos. A isto súmanse 7 iniciativas do sector servizos, mostrando a importancia do pequeno emprendemento e da actividade económica local na vida diaria dos concellos rurais.

Tamén se presentaron proxectos ligados ao ámbito da saúde, concretamente unha clínica dental e un centro de fisioterapia, así como unha iniciativa de atención a persoas maiores e un proxecto centrado no aforro enerxético nunha explotación gandeira do concello de Pol.

Esta diversidade reflicte a capacidade do territorio para xerar proxectos vinculados tanto á economía local como aos servizos necesarios para fixar poboación e mellorar a calidade de vida.

Proxectos non produtivos públicos

Os concellos do territorio presentaron 11 proxectos de carácter non produtivo público, centrados na mellora de infraestruturas, servizos e espazos de uso colectivo.

Este tipo de iniciativas permiten reforzar equipamentos e actuacións que repercuten directamente no benestar da veciñanza e na dinamización social dos municipios.

Proxectos non produtivos privados

Ademais, presentáronse 5 proxectos non produtivos impulsados por entidades privadas como asociacións veciñais, colectivos de cazadores ou entidades vinculadas ao sector vitivinícola.

Estas iniciativas poñen de manifesto o importante papel do tecido asociativo no desenvolvemento do territorio, promovendo actividades sociais, culturais e de valorización dos recursos locais.

Un apoio clave para o territorio

As axudas LEADER continúan sendo unha ferramenta fundamental para apoiar proxectos que nacen no propio territorio e responden ás necesidades reais da súa poboación.

Dende o GDR Montes e Vales Orientais seguimos acompañando ás persoas promotoras e entidades locais no desenvolvemento das súas iniciativas, apostando por un rural vivo, activo e con futuro.

O Xeodestino Ancares Terras de Burón está xestionado polo GDR Montes e Vales Orientais e ten en marcha unha ferramenta pensada para dar visibilidade á actividade cultural, social e turística do territorio: unha axenda aberta de eventos.

Esta iniciativa nace coa vontade de recoller e difundir todo o que acontece nos distintos concellos, facilitando que tanto a poboación local como as persoas visitantes poidan coñecer de primeira man a oferta existente. Dende actividades culturais e deportivas ata feiras, rutas, xornadas ou propostas vinculadas ao turismo, a axenda busca converterse nun punto de referencia común.

A axenda é para todos

Un dos aspectos máis relevantes desta proposta é que se trata dunha ferramenta aberta e colaborativa. Poden formar parte dela os eventos de concellos, asociacións, entidades, organizacións e tamén empresas privadas que desenvolvan actividades no territorio. O obxectivo é sumar esforzos para construír unha visión conxunta e actualizada de todo o que se está a facer, reforzando así a dinamización local e a promoción do destino.

A través desta axenda preténdese, non só informar, senón tamén poñer en valor o traballo que se realiza no territorio e facilitar a participación. Ao centralizar a información nun único espazo, mellórase a comunicación, evítase a dispersión e contribúese a que as actividades teñan maior alcance.

Como enviar o teu evento ou actividade á axenda

As persoas ou entidades interesadas en incluír os seus eventos poden facelo de forma sinxela, contactando con Fe (a xerente do GDR), no correo electrónico comunicación@ancaresterrasdeburon.gal ou no teléfono 659 275 743.

Para poder darlle difusión precísase a información e un cartel ou fotografía que acompañe os datos. Por exemplo se organizas un xantar popular e tes cartel, podes enviárnolo xunto á información de data, prezo, recollida de tickets, menú…

Esta nova axenda supón unha oportunidade para dar máis visibilidade ás iniciativas locais e seguir fortalecendo un territorio activo, dinámico e cheo de propostas ao longo de todo o ano.

A Xunta de Galicia publicou no Diario Oficial de Galicia (DOG) a convocatoria do programa Fogar Vivo, unha liña de axudas destinada a facilitar que vivendas baleiras se incorporen ao mercado de alugueiro con prezos accesibles.

O obxectivo desta iniciativa é activar vivendas que actualmente non se utilizan, apoiando ás persoas propietarias para que poidan acondicionalas e poñelas en alugueiro con máis garantías.

O obxectivo de Fogar Vivo

O principal obxectivo é mobilizar vivendas baleiras privadas para destinalas ao alugueiro, ofrecendo apoio económico ás persoas propietarias para reformalas, acondicionalas e garantir maior seguridade fronte a posibles riscos.

A quen vai dirixido

Poden solicitar estas axudas persoas físicas ou xurídicas propietarias ou usufrutuarias de vivendas.

As axudas do programa e as súas contías

• Unha axuda para facer fronte ao custo da contratación de seguros de impagamento de rendas e/ou seguros de multirrisco do fogar. Ata 3.000€.
• Unha axuda para a adecuación e a reparación da vivenda. Neste caso a axuda pode chegar ata os 11.000€ e a subvención será do 80% do gasto xustificado.
• Unha axuda vinculada á axuda de adecuación e reparación da vivenda, para o caso de que os alugados sexan menores de 36 anos ou con fillos/as menores de idade ou con persoas dependentes ao seu cargo con algún grado de discapacidade recoñecida. Ten unha aportación de 2.000€.

A contía máxima das axudas non poderá superar o límite de 16.000€ por vivenda.

Prazo de solicitude

As solicitudes están abertas ata o 3 de xuño. Pódense consultar as bases neste DOG.

Programas como Fogar Vivo permiten recuperar inmobles en desuso e ampliar a oferta de alugueiro, algo especialmente relevante en moitas zonas rurais. Se tes unha vivenda baleira, esta convocatoria pode axudarche a poñela en uso con apoio público.

A Axencia Galega de Desenvolvemento Rural publicou no Diario Oficial de Galicia a nova convocatoria de axudas LEADER 2023–2027, unha ferramenta clave para apoiar iniciativas que contribúan ao desenvolvemento económico, social e territorial do rural galego.

No caso do GDR Montes e Vales Orientais, esta convocatoria conta cun orzamento total de 1.457.158,96€, destinado a financiar proxectos que xeren actividade, emprego e mellora da calidade de vida no territorio.

A quen van dirixidas estas axudas?

As axudas LEADER están abertas a unha ampla variedade de promotores e promotoras, sempre que os proxectos se desenvolvan dentro do ámbito territorial do GDR Montes e Vales Orientais e cumpran a normativa vixente. Entre eles:

• Persoas autónomas e empresas.
• Asociacións e entidades sen ánimo de lucro.
• Concellos e entidades públicas locais.
• Comunidades de montes veciñais en man común.
• Mancomunidades.

Que tipo de proxectos se poden presentar?

A convocatoria permite apoiar tanto proxectos produtivos como non produtivos, entre os que destacan:

• Creación, modernización ou ampliación de empresas non agrarias.
• Iniciativas vinculadas á produción agraria, forestal ou á transformación e comercialización dos seus produtos.
• Proxectos de interese social ou comunitario que beneficien ao conxunto da poboación.
• Actuacións incluídas no programa Bono Activa Rural.

No caso dos proxectos produtivos, a axuda pode acadar ata o 50 % do investimento, cun límite máximo de 100.000 €.
Para os proxectos non produtivos, a subvención pode chegar ata o 90 %, cun máximo de 30.000 €.

Prazo e execución dos proxectos

O prazo para presentar solicitudes é de dous meses a partir da publicación da convocatoria no DOG, rematando o 6 de abril.

Unha vez aprobadas, as persoas ou entidades beneficiarias disporán do período 2026–2028 para executar os seus proxectos, cun calendario de investimento progresivo que garante a viabilidade e seguimento das actuacións.

Consulta as bases da convocatoria neste botón:

Tamén podes consultar os baremos de selección de proxectos produtivos e non produtivos:

Acompañamento desde o GDR

Desde o GDR Montes e Vales Orientais ofrecemos información, asesoramento e acompañamento durante todo o proceso: desde a idea inicial ata a presentación da solicitude.

A Xunta de Galicia, a través do Instituto Galego da Vivenda e Solo (IGVS), vén de publicar unha nova convocatoria de axudas destinadas á rehabilitación de vivendas en concellos rurais de menos de 5.000 habitantes, unha medida clave para mellorar as condicións de habitabilidade e contribuír á fixación de poboación no territorio.

En que consisten as axudas?

Estas subvencións cobren ata o 75 % do custo das actuacións, cun máximo de 30.000 euros por vivenda, e están dirixidas a diferentes tipos de intervencións, entre as que se inclúen:

• Rehabilitación xeral da vivenda (cubertas, forxados, accesibilidade).
• Mellora da eficiencia enerxética.
• Actuacións de protección fronte ao gas radón.
• Terminación, ampliación ou adaptación de inmobles.
• Cambio de uso de locais ou entreplantas para convertelos en vivendas.

Quen pode solicitalo?

As axudas están pensadas para:

• Uso propio: persoas propietarias ou usufructuarias con ingresos inferiores a 6,5 veces o IPREM.
• Alugueiro: sen límite de ingresos, cun máximo de 3 vivendas por persoa, coa obriga de destinar a vivenda ao programa Fogar Vivo, que garante alugueiros a prezo limitado durante un mínimo de 5 anos.

Onde e cando se poden solicitar?

Estas axudas están dispoñibles en concellos galegos de menos de 5.000 habitantes, segundo a listaxe do IGE 2025.

O prazo de presentación de solicitudes estará aberto do 21 de xaneiro ao 1 de setembro de 2026, ou ata o esgotamento do orzamento dispoñible (5 millóns de euros).

Como presentar a solicitude?

A tramitación realizarase de forma electrónica a través da sede electrónica da Xunta de Galicia, co código de procedemento VI435E. Será necesario achegar, entre outra documentación:

• Memoria das obras previstas
• Fotografías do estado actual da vivenda
• Licenza municipal ou autorización correspondente
• Declaracións responsables

As bases completas poden consultarse no DOG do 13 de xaneiro de 2026.

Desde o GDR Montes e Vales Orientais animamos ás persoas propietarias de vivendas no noso territorio a informarse sobre esta convocatoria. Trátase dunha oportunidade importante para rehabilitar vivendas, poñelas en uso e contribuír a revitalizar o rural.