O proxecto RETTURN persigue a innovación e a transformación do concepto “turismo rural”, centrándose en dar resposta á problemática da perda de patrimonio inmaterial xerada principalmente pola despoboación das zonas rurais. Busca xerar novas experiencias centradas na posta en valor de tradicións rurais en perigo de extinción.
Desde o GDR Montes e Vales Orientais traballamos coa FEGAMP (Federación Galega de Municipios e Provincias), e xunto ás Federacións de Municipios e Provincias de Andalucía, Aragón, Canarias, Extremadura e Valencia, neste proxecto.
Os obxectivos que perseguimos son os seguintes:
A recuperación do cultivo do centeo afrece unha paisaxe en singular mosaico e unha rica gastronomía ao redor deste cereal. Por outra parte, a palla de centeo e a preservación do oficio tradicional de teitador é esencial para teitar e conservar as pallozas, emblema tradicional da montaña lucense.
Na montaña oriental lucense, os apicultores souberon atopar nos muros de pedra seca, que hoxe son patrimonio da humanidade, o aliado natural para defender os trobos das abellas da afición do oso polo mel.
Na montaña de Lugo, a gandería extensiva é unha tradición ancestral que modelou unha paisaxe cultural. O uso da auga para prados de sega e dente, deu lugar a unha perfecta rede de presas e pozos que modela cuncas de alto valor ecolóxico.
