O sector vitivinícola como impulso da cultura, a economía e o turismo do territorio

Xornada divulgativa no pazo de San Marcos de Lugo no que se presentou o proxecto do Tunel de Viños, unha iniciativa subvencionada pola Cooperación LEADER na que participan seis Grupos de Desenvolvemento Rural (GDR)

Esta martes participamos no Pazo de San Marcos de Lugo nunha xornada divulgativa na que se presentou o proxecto do Túnel de Viños, unha iniciativa subvencionada pola Cooperación LEADER na que participan seis Grupos de Desenvolvemento Rural (GDR) de toda Galicia e que ten por obxectivo dar a coñecer os viños de diferentes Indicacións Xeográficas Protexidas (IXP), poñer en marcha un polígono vitivinícola en cada territorio e potenciar o enoturismo.

No acto, celebrado na sala de exposicións da sede da Deputación de Lugo, estivo presente a nosa xerente, Fe Álvarez, acompañada do deputado provincial de Promoción Económica e Social, Pablo Rivera Capón; do concelleiro de Cultura da FonsagradaSilbán Rodríguez Palmeiro; de Manuel, en representación do Concello de Navia de Suarna; e as adegueiras de Negueira de Muñiz e Navia de Suarna. Esta xornada divulgativa contou cunha clase maxistral pola mañá, a cargo dos expertos enólogos Luis e Alejandro Paadín, mentres que os asistentes puideron desfrutar na sesión vespertina dunha cata dirixida por Martiño Santos.

Xornada divulgativa no pazo de San Marcos de Lugo no que se presentou o proxecto do Tunel de Viños, unha iniciativa subvencionada pola Cooperación LEADER na que participan seis Grupos de Desenvolvemento Rural (GDR)

Dar a coñecer os viños da IXP Terras do Navia

Este proxecto do Túnel de Viños e as actividades que leva aparelladas buscan acadar un obxectivo triplo. Por un lado, o primeiro é dar a coñecer os diferentes viños que se producen nos territorios participantes. No noso caso trátase das variedades incluídas na IXP Terras do Navia e que se cultivan nos concellos de Negueira de Muñiz, A Fonsagrada e Navia de Suarna. Concretamente son o albariño, caíño branco, loureira, godello e torrontés, no referente aos brancos; e o albarín tinto, mencía, brancellao, merenzao, caíño tinto e loureiro, respecto aos tintos.

Mobilización de terras para facer polígonos vitivinícolas

segunda liña de traballo deste proxecto cooperativo é conseguir a mobilización de terras para intentar que en cada territorio se faga un polígono vitivinícola, o que axudaría a crear riqueza nas respectivas zonas e tamén postos de traballo.

O viño como un reclamo para atraer un turismo de calidade e sostible

Finalmente, o terceiro obxectivo é potenciar o enoturismo, é dicir, o turismo ligado ao viño. A IXP Terras do Navia parte con vantaxe neste tema, xa que conta cun potencial moi grande para desenvolver actividades relacionadas co enoturismo nun territorio no que hai dúas Reservas da Biosfera, así como varios espazos protexidos pola Rede Natura 2000. Esta meta tamén serviría para poñer en valor a cultura vitivinícola dos Montes e Vales Orientais buscando un turismo de proximidade, de calidade, non masificado e totalmente sostible.

Xornada divulgativa no pazo de San Marcos de Lugo no que se presentou o proxecto do Tunel de Viños, unha iniciativa subvencionada pola Cooperación LEADER na que participan seis Grupos de Desenvolvemento Rural (GDR)

Éxito de participación na primeira xornada de traballo para elaborar os proxectos piloto de ‘A Despensa de Ancares-Terras de Burón’

Primeira xornada de traballo para elaborar os proxectos piloto de 'A Despensa de Ancares-Terras de Burón'

A primeira das tres xornadas de traballo dirixidas a rematar de deseñar os primeiros proxectos piloto de ‘A Despensa de Ancares-Terras de Burón’ foi un auténtico éxito de participación.

A Casa do Concello de Baleira reuniu na tarde do xoves 28 de setembro a dúas decenas de hostaleiros e produtores do territorio interesados en participar nesta iniciativa que impulsamos o Grupo de Desenvolvemento Rural (GDR) Montes e Vales Orientais en colaboración co Polo de Emprendemento e Apoio ao Emprego dá Montaña.

O seu obxectivo é tender pontes entre o sector turístico e o agroalimentario para tecer unha rede colaborativa e incorporar os alimentos que se producen na zona, tales como pratos xa cociñados, conservas, embutidos ou bebidas, aos establecementos turísticos que non dispoñen de cociña nas súas instalacións.

Os participantes na xornada celebrada en Baleira intercambiaron os seus puntos de vista e as súas necesidades nunha cita moi enriquecedora para hostaleiros e produtores. Fe Álvarez, xerente do GDR, valora moi positivamente a resposta dos dous sectores. “A xente amosouse moi interesada neste proxecto e atopámonos cun grupo fantástico, traballador e moi colaborador. Grazas á boa disposición dos participantes, avanzouse moito neste proxecto novo. Hai que ser conscientes de que leva tempo botalo a andar, pero creo que estamos no camiño correcto”, explica.

Primeira xornada de traballo para elaborar os proxectos piloto de 'A Despensa de Ancares-Terras de Burón'

Nunha sesión de traballo que se alongou varias horas e na que xa se planificou unha nova reunión para dentro de tres semanas, hostaleiros, produtores e organizadores desenvolveron varios puntos. Houbo unha primeira parte a nivel técnico e logo foi a quenda de escoitar as aportacións das persoas asistentes.

Traballouse moito na cuestión de como se debe levar a cabo a loxística desta iniciativa a nivel organizativo, buscando solucións a problemas como a dispersión xeográfica ou a xestión de produtos perecedeiros. Así mesmo, falouse do expositor de ‘A Despensa de Ancares-Terras de Burón’. É dicir, dos deseños que se van facer para sinalar en cada establecemento hostaleiro o recuncho físico no que van estar, por unha banda, os produtos non perecedoiros (viño, cervexa, mel, marmeladas etc.) e, pola outra, o frigorífico no que estarán os produtos xa cociñados. A loxística e o empreazamento dos produtos nos establecementos, son puntos clave para seguir avanzando.

Esta acción enmárcase nunha das liñas estratéxicas para o noso GDR, no que tamén xestionamos o Xeodestino Ancares – Terras de Burón: ligar gastronomía e territorio. Así, os produtos de ‘A Despensa de Ancares – Terras de Burón’  poden ir acompañados dunhas fichas que conten a historia do territorio para así darlle valor ao mesmo.

Iniciativa aínda aberta a incorporacións

Desde o GDR Montes e Vales Orientais recalcamos que este iniciativa aínda segue aberta para que máis hostaleiros e produtores locais se sumen á mesma. “Estamos moi contentos porque a convocatoria foi un éxito e xa temos apuntados no proxecto a 23 hostaleiros interesados e tamén a moitos produtores como a Cooperativa A Carqueixa, a Asociación de Gandeiros da Fonsagrada (Asgafon), Ribeiregas, varios apicultores e distintas adegas vitivinícolas asentadas no territorio. Así mesmo, animamos a que se unan máis casas de turismo rural, xa que hai produtos moi interesantes que poden contribuír co seu negocio”, conclúe Fe Álvarez.

Primeira xornada de traballo para elaborar os proxectos piloto de 'A Despensa de Ancares-Terras de Burón'

Estratexia de Desenvolvemento Local

Cartel da Estratexia de Desenvolvemento Local Participativa do GDR Montes e Vales Orientais

Desde o GDR Montes e Vales Orientais, vimos de presentar a Estratexia de Desenvolvemento Local Participativa. Un documento que se traballou xunto aos axentes do territorio, para marcar os obxectivos e as liñas estratéxicas que marcarán as accións dos próximos anos (2023-2027) en canto a desenvolvemento local.

Xa podes descargar aquí a estratexia completa ou un resumo da mesma:

Obxectivos xerais

Na Estratexia de Desenvolvemento Local do GDR Montes e Vales Orientais, establécense sete obxectivos fundamentais:

– Promover a multifuncionalidade do sector primario e do monte, a mobilidade de terra e o incremento de renda.
– Fortalecer sector agroindustrial do produto local / estratexia ‘da Granxa á mesa’.
– Ecoturismo baseado en pequenos negocios, para un destino diferencial.
– Apoiar servizos innovadores, cooperando e usando as novas tecnoloxías.
– Mellorar a vida no rural con novos servizos e coidado de persoas desfavorecidas.
– Revitalización rural: Rehabilitar espazos e patrimonio para residencia e traballo colaborativo.
– Formación, asesoramento e innovación para o desenvolvemento sustentable e a valorización dos recursos.

Liñas estratéxicas

As liñas estratéxicas de traballo para o periodo 2023-2027 son:

– SECTOR PRIMARIO. Multifuncionalidade. Social. Económico e ambiental.
– SECTOR AGROALIMENTARIO. Produto local.
– ECOTURISMO. Espazos naturais, turismo de natureza.
– SERVIZOS INNOVADORES. Redes de colaboración, novas tecnoloxías
– SERVIZOS SOCIAIS. Calidade de vida, envellecemento activo, persoas vulnerables.
– LOITA CONTRA A DESPOBOACION. Vivendas, espazos de traballo, uso patrimonio.
– FORMACION. Liderar innovación, acceso a financiamento e valorización de recursos.

Consulta toda a información sobre o territorio e a estratexia, nos botóns de descarga que hai ao inicio deste artigo.

A Fonsagrada acolleu un encontro de labregos para intercambiar experiencias e buscar solucións coas que mellorar os seus proxectos na Montaña

Encontro de labregos da Montaña celebrado na Fonsagrada para coñecer os seus respectivos proxectos

A Fonsagrada foi escenario este mércores 21 de xuño dun encontro de proxectos labregos da Montaña, unha iniciativa organizada polo Grupo de Desenvolvemento Rural (GDR) Montes e Vales Orientais, en colaboración co Sindicato Labrego Galego (SLG), que se desenvolveu ao longo da mañá e da primeira hora da tarde na tenda da Asociación de Gandeiros da Fonsagrada (Asgafon). A cita atraeu a uns 20 profesionais do sector e incluíu unha visita guiada, xa pola tarde, á granxa de David Outeiro.

O obxectivo principal desta actividade foi “reunir a distintos labregos e labregas do territorio e a outra xente relacionada co sector para que compartan experiencias e fagan comunidade coa idea de elaborar unha estratexia LEADER coa que potenciar os seus proxectos e sacarlles un maior rendemento”, expuxo Fe Álvarez, xerente do GDR Montes e Vales Orientais.

A xornada comezou as 10.30 horas cun café de benvida, ao que seguiu a presentación dos distintos proxectos labregos. Foron un total de 19 os que se amosaron e valoraron, desde varias gandarías ecolóxicas de distintas especies animais -vacas, porcos, ovellas, cabras, polos ou coellos- ata proxectos de turismo e produción agroalimentaria ou mesmo a iniciativa do Departamento de Produción Animal da Universidade de Santiago de Compostela.

Conclusións e degustación

Posteriormente, todos os labregos e labregas participantes fixeron unha posta en común analizando as necesidades que existen na zona da Montaña e estudaron varias das propostas para intentar melloralas e atopar solucións idóneas a todas as problemáticas que se lles presentan no seu día a día ás súas explotacións.

Logo dun pequeno xantar, que incluíu a degustación de produtos de Asgafon, a xornada continuou pola tarde cunha posta en común de todo o que se falou durante a mañá para tirar conclusións e valorar se algunha destas poderían ser incluídas na futura estratexia LEADER do GDR. Este encontro de proxectos labregos finalizou coa visita á granxa de David Outeiro.

Encontro de labregos da Montaña celebrado na Fonsagrada para coñecer os seus respectivos proxectos

Valoración dos participantes

Os labregos e labregas que se achegaron á tenda de Asgafon para coñecer outras realidades e ofrecer a súa visión sobre as súas explotacións agroalimentarias na Montaña fixeron unha valoración moi positiva desta iniciativa posta en marcha polo GDR Montes e Vales Orientais e o Sindicato Labrego Galego.

David Outeiro, propietario da granxa ecolóxica de vacas cachenas, onde practica a coñecida como gandaría rexenerativa, foi un dos que expuxo o seu proxecto vital e empresarial, que se iniciou no 2021 cando se veu “da cidade de Lugo ata Mazaira, na Fonsagrada, terra de orixe de miña nai, para poñer este proxecto en marcha porque creo nun futuro no medio rural para a mocidade”, sinalou.

Outeiro considera “esencial que os proxectos labregos asentados no territorio teñan unha relación co programa LEADER e os GDR que os xestionan os poidan ter en conta”, ao tempo que asegura que é tamén importante “facer este tipo de actividades para intercambiar necesidades, opinións, formación e sobre todo ter unha convivencia e un coñecemento mutuo”, concluíu.

Pola súa banda, Dora Cabaleiro, labrega, integrante do Sindicato Labrego Galego e copropietaria da Cooperativa Ribeiregas, en Navia de Suarna, tamén amosou a súa gratitude pola organización deste encontro. “Estou moi feliz de que se fixera esta iniciativa porque me parece moi importante que, na situación de colapso que vivimos na actualidade, se estean buscando fórmulas para unha transición agroecolóxica e que nesta se teña en conta a produción primaria, xa que os labregos e labregas somos os que custodiamos o territorio”, subliñou.

Cabaleiro aplaude “calquera iniciativa conxunta, colaborativa e participativa que faga rede deses proxectos, que os poña en contacto e sirva para planear xuntos cales son as necesidades que temos no territorio, polo que vexo moi positivo para a comarca este primeiro encontro e agardamos que sexa semente de próximas colaboracións”, demanda.

‘A Despensa de Ancares e Terras de Burón’ chega aos establecementos turísticos do territorio

Presentación aos establecementos turísticos do territorio de 'A Despensa de Ancares e Terras de Burón'

Desde o Grupo de Desenvolvemento Rural (GDR) Montes e Vales Orientais, en colaboración co Polo de Emprendemento e Apoio ao Emprego da Montaña, organizamos unha actividade en Navia de Suarna e A Fonsagrada coa que se persegue impulsar as sinerxias que se poden dar entre os sectores turístico e agroalimentario instalados nos Ancares e Terras de Burón.

O obxectivo principal foi xuntar a diferentes sectores económicos do territorio que contan con necesidades, barreiras e problemáticas aparentemente diferentes e poñer en marcha solucións conxuntas que redunden nun beneficio para todos e, en consecuencia, colaborar no desenvolvemento do territorio. Dúas foron as problemáticas máis notorias que trataron nesta dobre actividade e ás que se lle pode atopar solución uníndose. Por unha banda está o desequilibrio entre a oferta de aloxamentos e a oferta de restauración, xa que neste territorio hai moitos máis aloxamentos que establecementos que sirvan comidas ou ceas aos visitantes; e pola outra banda, hai un sector agroalimentario que está poñendo no mercado produtos de gran calidade e que están buscando darlle saída e ampliar as súas canles de venda.

Primeiras incorporacións

A Despensa de Ancares e Terras de Burón está espertando un grande interese entre os establecementos turísticos do territorio, que eran moi conscientes desta necesidade”, explica Fe Álvarez, xerente do GDR Montes e Vales Orientais. De feito, engade, “algúns albergues e casas rurais xa solicitaron incorporar os produtos desta despensa para ofrecerlla ás persoas que nos visitan coma un servizo complementario ao aloxamento”, apunta.

A primeira cita tivo lugar o 14 de xuño no café-bar Xegunde da Proba, en Navia de Suarna. A segunda desenvolveu un día despois, o 15 de xuño, na Tenda de Asgafon, o establecemento que a Asociación de Gandeiros da Fonsagrada abriu recentemente na localidade fonsagradina.

Nestes dous eventos presentóuselles aos responsables de negocios de hostalería da zona a oferta gastronómica realizada por dous axentes con forte implantación no territorio coma son Asgafon e A Carqueixa. Esta oferta gastronómica está centrada na liña de pratos caseiros xa cociñados que lanzaron recentemente ambas entidades e que xa comercializan a través da Rede e nos seus propios establecementos físicos. Estes pratos cociñados son susceptibles de seren ofrecidos polos establecementos turísticos e hostaleiros da zona, axudando a complementar os servizos que ofrecen aos visitantes e tamén impulsando a economía local e aos produtores do territorio. ‘A Despensa de Ancares e Terras de Burón’ tamén está aberta á incorporación doutros produtos da zona coma viños, queixos, mel ou conservas, entre outros.

Tecer redes de colaboración

A organización deste evento encaixa na filosofía de traballo do noso grupo, que busca establecer redes colaborativas no territorio que impulsen o desenvolvemento local en todos os seus ámbitos. Así, a meta última é que se establezan liñas de traballo e unha colaboración máis estreita entre produtores e hostaleiros. “Nestas presentacións esperamos incorporar máis establecementos interesados e en futuras actuacións intentaremos implicar a outros sectores da zona, reforzando ademais a colaboración xa establecida entre o Polo de Emprendemento e o GDR”, avanza Fe Álvarez.

Entre estas futuras sinerxias a explorar están actores como empresas ou entidades relacionadas coa loxística, o transporte ou o marketing, que poidan participar no desenvolvemento desta colaboración xa iniciada entre produtores e hostaleiros.

Ruta guiada con Piornedo Anda para seguir tecendo a rede de mulleres

Cartel curto da ruta guiada con Piornedo Anda e o colectivo de Mulleres do Territorio en Rede

O EVENTO

Un roteiro etnográfico polo Piornedo co que consolidar a rede de mulleres e continuar co traballo feito na xornada ‘Mulleres do Territorio. Elaborando a estratexia Leader’.

INFORMACIÓN CLAVE

  • Punto de encontro: escola de Piornedo.
  • Data: domingo 4 de xuño de 2023.
  • Horario: de 10 a 16:30 horas, aproximadamente.
  • Prezo de inscrición: Totalmente gratuíta con prazas limitadas. Apúntate aquí.
  • Dirixida a mulleres de calquera idade dos concellos do GDR Montes e Vales Orientais.
  • Recoméndase levar pantalón longo, calzado axeitado para camiñar e auga.

TECENDO A REDE DE MULLERES DO TERRITORIO

GDR Montes e Vales Orientais, xunto con Piornedo Anda, prepara para o día 4 de xuño unha ruta etnográfica guiada en Piornedo (Cervantes) co obxectivo de darlle continuidade ás conexións e á rede de mulleres da xornada ‘Mulleres do Territorio en Rede. Elaborando a estratexia Leader’, que se celebrou o pasado 25 de marzo en Pol.

A ruta arrincará ás 10 horas desde a escola de Piornedo e rematará no mesmo punto ao redor das 16.30 horas. A inscrición, que se pode facer a través deste formulario, é totalmente gratuíta e conta con prazas limitadas. Antes de comezar o percorrido e ao final da andaina haberá café para todas e durante o percorrido faremos un descanso para comer todas xuntas ao aire libre. O bocadillo, unha froita e unha botella de auga serán facilitadas pola organización. Recoméndase levar pantalón longo e calzado axeitado para camiñar.

Cartel completo da ruta guiada con Piornedo Anda e o colectivo de Mulleres do Territorio en Rede

PIORNEDO ANDA

Piornedo Anda é un colectivo que ten como finalidade principal poñer en valor o lugar de Piornedo e a súa grande riqueza en canto a fauna, flora, etnografía e cultura. Para conseguilo, as súas impulsoras, Lola e Isolina, preparan e organizan ao longo do ano distintas andainas cunha esixencia adaptada á maioría dos públicos e nas que combinan paisaxe con lendas, mitoloxía e a apaixonante historia da zona.

Deste xeito, moitos domingos poñen en marcha roteiros guiados por sendeiros e camiños antigos dos montes da zona. A maioría das veces son circulares e contan cuns percorridos que van dos 7 aos 12 quilómetros de distancia, polo que teñen unha duración aproximado de entre 3 e 5 horas. Durante os mesmos, as guías ofrecen distintas explicacións sobre usos e costumes tradicionais do monte e da vida destes lugares de alta montaña.

Ademais, tamén organizan actividades de encontro na montaña dirixidos a colexios, asociacións de todo tipo e grupos adaptados ás demandas e características que teña cada un deles, tales como rutas etnográficas con ou sen xantar, recreacións lúdicas dos traballos de antes ou xogos tradicionais.

ÚNETE Á REDE DE MULLERES DO TERRITORIO

Anímate a compartir unha mañá de convivencia e descubrir da man de dúas veciñas do lugar un lugar único como Piornedo.Inscríbete no seguinte formulariohttps://forms.gle/NChVdB6dAUz277KQ7

Revolta Rural, maratón de emprendemento

Cartel do maratón de emprendemento Revolta Rural!

Desde o GDR Montes e Vales Orientais estamos colaborando na organización do maratón de emprendemento Revolta Rural! que terá lugar os días 19 e 20 de maio en As Pontes de García Rodríguez.

Este maratón de emprendemento ten como obxectivo impulsar ideas de emprendemento no rural e concretamente nos territorios onde traballamos os tres GDR que participamos: Terras de Miranda, Seitura 22 e Montes e Vales Orientais. Ademais conta coa colaboración de Rural Talent, CaixaBank e a Axencia Galega de Desenvolvemento Rural, entre outras entidades.

A través de iniciativas coma esta queremos apoiar o emprendemento nas nosas comarcas, favorecer a creación de emprego, fixar poboación no territorio e potencias a cultura emprendedora.

QUE É UN MARATÓN RURAL?

Durante dúas xornadas, reunirémonos persoas emprendedoras, empresas de referencia, persoas expertas en diferentes ámbitos (tecnoloxía, validación de ideas, marketing, comercialización…) para traballar de forma conxunta en solucións aos 6 retos que lanzamos os tres Grupos de Desenvolvemento Rural que participamos.

Os proxectos ou ideas seleccionadas para participar neste maratón terán que presentar a súa idea de negocio en formato «pitch» o sábado 20 de maio ante un xurado que realizará unha valoración das mesmas atendendo a criterios como: innovación, viabilidade económica, creación de emprego, recursos do territorio ou a propia exposición da idea.

Apoiarase aos proxectos gañadores con tres premios por cada GDR. No caso dos proxectos que teñan como ámbito de actuación o GDR Montes e Vales Orientais os premios serán os seguintes:

  • Primeiro premio – 2.500€ en metálico e 20 horas de mentoría.
  • Segundo premio – 1.500€ en metálico e 20 horas de mentoría.
  • Terceiro premio – 500€ en metálico e 10 horas de mentoría.

Ademais, os proxectos seleccionados incorporaranse a un proceso de incubación de proxectos de emprendemento rural de ata seis meses da man de Rural Talent e CaixaBank.

QUEN PODE PARTICIPAR?

Poden apuntarse a este maratón:

  • Persoas que queiran emprender un proxecto no noso territorio.
  • Empresas do noso territorio que queiran desenvolver novas liñas de negocio, que teñan unha facturación inferior a 150.000 euros e data de constitución inferior a tres anos.

Nos dous casos, é preciso que as ideas presentadas se poidan enmarcar nalgún dos retos plantexados para este maratón e que os proxectos estean establecidos ou se vaian a establecer nalgún dos concellos dos tres GDR convocantes.

Os proxectos que se presenten deberán executarse antes do 31 de decembro do 2023 e poderán estar xa en proceso de execución no momento de presentarse a esta convocatoria.

Toda a información está detallada nas bases de participación.

CALES SON OS RETOS?

Neste maratón queremos impulsar proxectos e ideas innovadoras, sostibles e viables que axudena impulsar o desenvolvemento económico e a calidade de vida nos nosos territorios. Poderanse presentar ideas e proxectos que encaixen nestes seis puntos:

  1. Turismo activo e experiencias turísticas.
  2. Plataformas de comercialización turística.
  3. Produción, transformación e comercialización agroalimentaria.
  4. Sector forestal.
  5. Sector enerxía.
  6. Servizos á poboación.

POR QUE INSCRIBIRSE?

  • Participarás en talleres especializados que che axudarán a darlle forma á túa idea de negocio.
  • Compartirás dúas xornadas con outras persoas emprendedoras.
  • O teu proxecto pode gañar ata 2.500€ para darlle un primeiro impulso.
  • Poderás formar parte dunha incubadora de emprendemento e acceder a 6 meses de mentoría especializada.

CANTO CUSTA?

O evento é gratuíto e inclúe a manutención das persoas participantes durante as xornadas da Revolta Rural. Se tes unha idea de emprendemento no noso territorio, anímate a participar!

COMO INSCRIBIRSE?

Podes inscribirte antes do 15 de maio ás 22 horas, na páxina web de Rural Talent, deixamos aquí ligado o formulario directo e nesta outra ligazón as bases legais.
Unha vez recibidas as solicitudes de inscrición, contactarase por correo electrónico ás persoas ou entidades seleccionadas para participar.

Desde o GDR Montes e Vales Orientais, estaremos encantad@s de axudarche coa inscrición e resolver calquera dúbida. Ponte en contacto con nós!

Representantes das entidades que colaboran co maratón de emprendemento Revolta Rural

As mulleres do territorio comparten unha xornada para traballar na elaboración da estratexia LEADER do GDR Montes e Vales Orientais

O Grupo de Desenvolvemento Rural (GDR) Montes e Vales Orientais continúa traballando na consolidación dunha rede de mulleres no territorio a través de distintas actividades. Entre elas destacou a xornada de intercambio e convivencia dirixida a mulleres de todas as idades e sectores que se desenvolveu este pasado sábado 25 de marzo na Casa Chaín de Pol co obxectivo de buscar solucións e facer propostas para incentivar o emprendemento e que as mulleres elixan a Montaña Lucense para vivir e empezar unha carreira profesional ou empresarial.

Baixo o título ‘Mulleres do territorio en rede. Elaborando a estratexia Leader’, esta actividade do GDR Montes e Vales Orientais ocupou todo un sábado con varias mesas de diálogo, tormentas de ideas e unha táboa redonda para extraer as conclusións finais, antes de facer unha visita cultural ao mosteiro de Meira, co que se pechou a xornada. Estas conclusións derivadas a partir das experiencias das mulleres participantes servirán para facer unha boa estratexia LEADER que apunte sobre as accións, liñas estratéxicas e tipos de proxectos que se deberían incentivar a través do GDR.

O evento arrincou cun café as dez da mañá que serviu de toma de contacto entre as participantes para posteriormente levarse a cabo a benvida oficial a cargo de Lourdes Abuide, propietaria da Casa Chaín; Fe Álvarez, xerente do GDR encargada de explicar o programa; e Verónica Marcos, presidenta en Galicia da Federación de Asociaciones de Mujeres Rurales (FADEMUR), que contou a súa experiencia á fronte deste colectivo.

Mesas sectoriais

Durante tres horas desenvolvéronse as distintas mesas de diálogo sectoriais con diferentes e variadas temáticas. Comezou a xornada coa mesa de ‘Cultura, Educación e Lecer’, na que se falou de asociacionismo, do papel das mulleres como dinamizadoras da cultura e das actividades sociais, da educación no rural ou do importante de xerar comunidade. Ofreceron a súa visión Branca Villares, mestra de música tradicional na Montaña; Isabel Calvete; presidente da Anpa do CPI Cervantes e vicepresidenta da Federación Galega de Anpas; Isa García, de Trécola Producións; Mercedes López, da Asociación de Mulleres Olvido de Pol; e Laura Burgué, da Asociación Cultural Camiño Primitivo de Baleira.

Logo dunha pausa para un café e un pequeno espectáculo de títeres a cargo de Trécola Producións, tomou a remuda a situación da ‘Agroindustria, gandería e forestal’ e nela tomaron parte Pepita Fernández, a primeira produtora de ovo ecolóxico de Galicia; Ángela, a presidenta da Comunidade de Montes de Parada, en Baleira; Rocío Regueira, técnica da Asociación de Gandeiros da Fonsagrada (Asgafón); e Ana Álvarez, gandeira de Navia de Suarna. Contou coa moderación de Margarida Prieto, do Sindicato Labrego Galego, e durante a charla falouse dos retos do sector, o papel da muller nestes ámbitos, as lexislacións que afectan ao monte e a gandería, a titularidade compartida das explotacións, a cotización das mulleres gandeiras ou os prezos de producir alimentos.

Tomou a remuda a mesa dedicada ao turismo, con Isolina Rodríguez, de Piornedo Anda; Jimena Santalices, de Las Cabañas de Ancares; Diana Forero, dos Apartamentos Sons do Eo; e Susana Sanz, da Casona de Labrada. Coa moderación de Yoani Jartín, técnica de Turismo do Concello de Meira, tocáronse temas como as novas oportunidades na zona, o turismo de selfie fronte outros modelos de turismo máis respectuosos co entorno, a necesidade de actividades complementarias e abordouse como o turismo pode servir para diversificar outros sectores económicos do territorio.

Ás 14.30 horas foi o momento para a comida, tempo no que as participantes se dividiron en grupos de cinco ou seis e realizaron unha posta en común durante a mesma. Ao estilo dun brainstorming ou tormenta de ideas, as opinións de cada grupo serviron para tirar posteriormente unhas conclusións coas que enriquecer a estratexia LEADER do GDR.

A sesión vespertina deu comezo ás catro da tarde coa última mesa sectorial, que estivo dedicada aos ‘Servizos innovadores’ participaron Silvia Saavedra, da Casa Niño de Navia de Suarna; Laura Doval, de Gaitafilmes; Rosa Pérez, vicepresidenta da Asociación de Mulleres de Pol; Mónica Perán, arquitecta e presidenta da Asociación de Empresarios de Meira; Leticia Gutiérrez, de Ancares Centro Deportivo e da Casa do Maior de Becerreá; Ana Díaz, de Arela Comunicación Sostible; e Guadalupe Anzótegui, tradutora literaria e técnico-científica na Pontenova. Falaron da oportunidade e necesidade de servizos de conciliación e de como proxectos innovadores teñen oco e éxito desde o rural.

Entre as cinco e as seis da tarde procedeuse coa posta en común das conclusións que extraeu cada grupo durante a comida de traballo e a xornada pechouse cunha visita cultural ao Mosteiro de Meira.

Agradecemento e conclusións positivas

Desde o GDR agradecemos a asistencia de todas as participantes e a implicación das máis de 20 mulleres que non dubidaron en ofrecer a súa visión e experiencias participando como poñentes nas mesas redondas desta enriquecedora xornada. Tanto a organización como todas as mulleres que se achegaron á Casa Chaín saíron moi contentas co resultado da xornada, xa que entenden que é importante para tecer unha rede que fará comunidade e tamén servirá para colaborar no desenvolvemento do territorio no futuro.

Mulleres do territorio en rede. Elaborando a estratexia Leader

Cartel sinxelo do programa de Mulleres do Territorio en Rede do GDR Montes e Vales Orientais

O EVENTO

Unha xornada de intercambio e convivencia por e para mulleres coa que facer unha estratexia Leader participativa e con perspectiva de xénero.

INFORMACIÓN CLAVE

  • LugarCasa Chaín de Pol.
  • Data: sábado 25 de marzo de 2023
  • Prezo: Inscrición, comida e actividades totalmente gratuítas.
  • Dirixida a: mulleres de calquera idade que estean interesadas en compartir as súas inquedanzas e escoitar as doutras. Haberá máis de 20 poñentes en varias mesas de diálogo.

TECENDO A REDE DE MULLERES DO TERRITORIO

Para continuar consolidando as conexións e o networking no territorio, esta xornada terá unha continuación o sábado 1 de abril en Piornedo cunha ruta etnográfica guiada por Piornedo Anda. A inscrición nesta ruta á completamente gratuíta a través deste formulario. Podes ampliar información neste artigo.

Mulleres do territorio en rede

Desde o Grupo de Desenvolvemento Rural (GDR) Montes e Vales Orientais organizamos a xornada de intercambio e convivencia ‘Mulleres do territorio en rede. Elaborando a estratexia Leader’, unha iniciativa que se levará a cabo este vindeiro sábado 25 de marzo e que ten como un dos seus obxectivos principais buscar solucións e facer propostas para incentivar o emprendemento e que as mulleres elixan a Montaña Lucense para vivir e empezar unha carreira profesional ou empresarial.

Esta xornada de traballo terá como escenario a Casa Chaín de Pol, é totalmente gratuíta e está dirixida a mulleres de todas as idades.

O evento dará comezo ás 10 da mañá e finalizará xa pola noite. Durante a xornada desenvolveranse unha serie de mesas de diálogo e actividades coas que darlle forma a unha estratexia Leader participativa e con perspectiva de xénero. Deste xeito, trataranse que aspectos son importantes á hora de facer un proxecto no noso territorio ou que se debería incentivar, entre outros moitas cuestións.

O evento pretende que dende a experiencia de moitas mulleres que viven e traballan no territorio se poda afondar sobre os aspectos importantes á hora de facer unha boa estratexia LEADER, que se traballe sobre as accións, liñas estratéxicas e tipos de proxectos que se deberían incentivar. Buscamos que esta rede de mulleres se active como unha comunidade de apoio e intercambio de ideas aberta a calquera muller da zona que queira formar parte e aprender da experiencia, vivencias e ideas de todas. Pretendemos tecer unha rede de networking entre mulleres que, ademais de incidir de forma directa no deseño do desenvolvemento do territorio, se poidan apoiar entre si, o que pode ser moi importante para o futuro.

Esta xornada de intercambio e convivencia contará con distintas mesas entre as dez da mañá e as seis da tarde, finalizando o día cunha visita cultural ao mosteiro de Meira. Xa está confirmada a presenza de máis de 20 mulleres que participarán nas distintas mesas redondas que hai programadas.

O evento arrincará ás 10 horas cun café que servirá de toma de contacto entre as participantes para posteriormente realizarse a benvida oficial, a partir das 10.30 horas, que correrá a cargo de Lourdes Abuide, propietaria da Casa Chaín; Fe Álvarez, xerente do GDR que explicará o programa da xornada e que obxectivos se buscan con ela; e Verónica Marcos, presidenta en Galicia da Federación de Asociaciones de Mujeres Rurales (FADEMUR), que contará a súa experiencia á fronte deste colectivo.

Entre as 11 e as 14 horas desenvolveranse as distintas mesas de diálogo sectoriais que terán como temáticas cuestións como os servizos, o turismo, a agroindustria, a gandería, a cultura ou o lecer.

A mañá pecharase cunha comida de traballo, tamén gratuíta, na que as participantes se dividirán en grupos e farán unha tormenta de ideas. A sesión vespertina dará comezo cun café e posta en común na que cada grupo expoñerá as conclusións ás que chegou durante a comida.

Posteriormente haberá un teatriño de títeres e ás seis da tarde pecharase a xornada de traballo para dar paso á visita cultural ao mosteiro de Meira.

Inscrición aberta

O prazo de inscrición estará aberto ata que se complete o aforo, que será de 50 persoas. Aquelas mulleres interesadas en participar poden anotarse aínda a través de Whatsapp no número 659275743, enviando un correo electrónico á dirección montes.vales.orientais@gmail.com. A participación e todas as actividades que inclúe a xornada son totalmente de balde.

Programa:

  • 10 horas – Toma de contacto tomando un café
  • 10:30 horas – Benvida
  • 11:00-14.30 horas – Mesas de diálogo
  • 14:30- 15.30 horas – Comida de traballo
  • 15.30 – 18.00 horas – Café e posta en común
  • 18:30 horas – Visita cultural ao Mosteiro de Meira

 Máis iniciativas

Ademais de nesta xornada, o GDR Montes e Vales Orientais tamén traballa noutra actividade que se desenvolverá unha semana máis tarde, na primeira fin de semana de abril, e que cremos que servirá para consolidar esta rede de mulleres, para continuar establecendo contactos e facendo actividades no territorio. Consistirá nunha ruta guiada coa Asociación Piornedo Anda na que se dará a coñecer o fantástico entorno desta localidade. Podes inscribirte á ruta aquí.

Programa completo das xornadas Mulleres do Territorio en Rede do GDR Montes e Vales Orientais